有乜慘得過畀人賣咗豬仔都唔知吖？八達通公司粒聲唔出，將數百萬名客戶資料當商品咁賣畀其他公司，全城震怒，矛頭直指講大話唔眨眼嘅八達通行政總裁陳碧鏵。

身為行政總裁，陳碧鏵回應醜聞前後矛盾，大話連篇，個人誠信肯定有問題喇，所以，無論港鐵棄車保帥又好，壯士斷臂也罷，如果炒咗呢個大話精，都係順理成章，唔單止冇人會覺得奇怪，反而會拍爛手掌添。問題係，將市民私隱當商品咁賣來賣去唔係今日至發生，更唔係限於八達通一間公司，港鐵尋日召開董事會後淨係講聲「十分不滿」，並向市民致歉，根本於事無補。
呢，有團體調查咗多家大型連鎖商戶嘅會員積分計劃條款後發現，申請人全部被要求提供身份證號碼、收入同消費能力呢類超出聯絡用途嘅個人資料。最攞命嘅係，大部分計劃都聲明，有權將申請者個人資料轉移畀其他機構，唔使事先通知，亦毋須負上法律責任。咁擺明係利用灰色地帶走法律罅，當消費者係羊牯喇。

私隱專員吳斌尋日臨別秋波，公布八達通事件中期調查結果，指出咗九處不當，並證實八達通轉交第三者嘅客戶資料，除咗推銷活動所需嘅客戶姓名同聯絡方法外，仲包括身份證、職業及消費記錄等，更冇禁止有關機構將資料轉移去海外。

數以百萬計市民嘅個人私隱資料任人派通街，仲有王法嘅？唉，無計喇，私隱專員公署不嬲係無牙老虎，吳斌呢次雖然唱主角，但能夠做嘅亦只係提吓建議，好似要求機構向客戶解釋資料會點用，轉移個人資料前，要作私隱評估等等。細眉細眼，隔靴搔癢，莫講話治本，連治標都唔得喇。

客戶資料有價又有市，商戶喺消費者毫不知情之下，將資料轉賣圖利，居然冇人理，所謂私隱條例好明顯係形同虛設喇。
擺明監管失職，實在難辭其咎

講來講去，私隱零保障，港府應該負最大責任。當局只係將私隱專員公署當政治花瓶，洋人有我亦有，根本唔重視保障市民私隱。以今次為例，八達通嘅大股東係港鐵，而港鐵大股東正正係港府，你話港府有冇責任吖？